Vawiin July 21, 2022, Ningani khan Home Ministry, Mizoram leh Mizoram Baptist Kohhran thawhhona-in Mizoram Police Southern Range hnuaia Detoxification & Rehabilitation Camp ni 45 awh tur hawnna inkhawm,Recreation Hall 2nd Bn. MAP Headquarters, Luangmual, Lunglei ah neih a ni a, Pu Saidingliana MPS, Comandant 2nd Bn. MAP chu khual lian a ni.
Programme hawnna inkhawm hi Pu K.Beihmotaosa MPS, Dy.Commandant, 2nd Bn.MAP in a kaihruai a, Rev. Vanlalmuankima, Director, Pastoral Ministry Department, BCM chuan hunserh hmangin, Programme te Pathian hnenah a hlan a.Chief Guest bak ah, Pu Rex Zarzoliana Vanchhawng, SP Lunglei leh Inspector V.Thawnghua, Camp Director ten thu an sawi. .
He Programme hi Home Ministry ruahmanna-a Police te taksa, rilru leh thlarau siamtharna atana buatsaih a ni a, ni 45 awh tura ruahman niin, hemi chhung hian hun hrang hrang pathum ah then in programme duan a ni a. Hun hmasa ber atan Detoxification ni 7 chhung July ni 21-27 hman a ni ang a, Christian Hospital Serkawn a Doctor leh nurse ten an buaipui ang. Hun 2-na hi ni 10 chhung July 28 atanga August 6 thleng hman a ni ang a, Thlarau lama intuaitharna hun hmangin Upa RL Thianghlima, Mizoram Evangelical Ministry Team ten Salvation Camping an neih pui ang. Hun 3-na, a hnuhnung ber ni bawk hian ni 28 chhung August 7 atanga September 3 thleng a awh ang a, Follow-up programme -ah hmangin Counselling, thlarau lama hmasawnna tura infuihna leh Police lam atanga infuih tharna te hmangin hun an hmang dawn a ni. Detoxification & Rehabilitation Camp ah hian Police thawklai mi 53 tel tura beisei an ni.
