Tunkar Pathianni, July ni 3 hi Mission Sunday a ni a, Tualchhung Kohhran tinah hman a ni ang.

Tunkar Pathianni, July 3, 2022 hi Mizoram Baptist Kohhran ni pawimawh, “Mission Sunday” a ni a. He ni hi kum tin, July Pathianni hmasa berah hman thin a ni. Kuminah pawh he ni pual hian Mizoram Baptist Kohhran chuan Programme siamin Kohhran tinah hun an hmang leh dawn a ni.

Lunglei Khawpui chhung, Pastor Bial hruaitute leh BCM Puipa ten inkawmhona an nei.

June 27, 2022 (Thawhtanni) khan Mizoram Baptist Kohhran puipate leh Lunglei khawpui chhung, Zotlang Bial leh Thririat Bial inkara Bialtu Pastor leh Pro-Pastor te, Bial hruaitu- Chairman leh Secretary te inkawmhona an nei a. Inkawmhona ah hian mi 33 an kal khawm a ni.

APBF Extraordinary General Meeting ah Rev. R. Lalnunzira, Associate General Secretary (Service) a tel.

Asia Pacific Baptist Feceration (APBF) chuan Extraordinary General Meeting June 28, 2022 10:00 a.m khan Zoom kaltangin a buatsaih a, BCM aiawhin Rev. R. Lalnunzira, Associate General Secretary (Service) a tel.

'Tualchhung Kohhran tinah Church Expansion Committee’ din turin ruahmanna a siam a ni

Tukar, Thawhlehni, June 28, 2022 khan Administrative Department Committee Meeting, BCM Committee Room No.1-ah neih ani a. Meeting chuan Kohhran rawngbawlna leh than zelna tur atan Tualchhung Kohhran tinah Church Expansion Committee din turin a rel a, Church Expansion Committee din kawnga inkaihhruaina tur ruahmanna a siam nghal bawk. 

 

Baptist Publication Board in member 7 awmna ‘Team of Proof Readers’ a din.

Tunkar Nilaini, June 29 –a Baptist Publication Board Meeting, Headquarters Office Committee Room No.1-a neih a ni a, Meeting hi Rev.R.Lalnunzira, AGS (Service) in a kaihruai a. Thurel zing ah BCM Publication te lo endik a, siamthat ngai lai te lo siamtha tur member 7 awmna ‘Team of Proof Readers’  a din a, member atan hengte hi ruat an ni.

Lawngtlai-ah Baptist Mipa Pawl (BMP) din chhan Campaign hawnna neih a ni.

Mizoram BMP Rorelna-in Pastor bial hrang hrangah BMP dinchhan campaign neih ni se ti-a a lo rel tawh bawhzuiin, Lawngtlai Area chhunga hma lak tanna turin  June 30, Chawhma dar 11:30 khan BCM Biak In, Bazar, Lawngtlai-ah BMP din chhan Campaign hawnna hi hman a ni. 

R & D-in BES Khawmawiah Disaster Reduction Awareness Programme an neihpui.

29th June, 2022 khan R&D Department ten 'Awareness on Disaster Risk Reduction' program neiin Baptist English School, Khawmawiah hun an hmang a, Nl. T.Lalfawnvelin zirtirna a pe. He hunah hian School Naupang 80 vel leh Zirtirtu 11 kalin, programme hlawk tak hman a ni.  R&D Department hian khawtlang hmasawnna leh chhiatrupna a lo thlen pawha inven dan tur zirtirna hi kum tamtak an lo kalpui tawh thin a ni.

TKP Serkawn Pastor Bial-in Environment humhalh nan Thing tiak 50 an phun.

Thalai Kristian Pawl, Serkawn Pastor Bial chuan Environment Humhalh kawnga hmalakna  atan, Lunglei khawpui tui tlan ber, Tlawng hnar ah June 25, 2022 (Inrinni) khan Thingphun Hnatlang neiin thing tiak 50 phunin, an thingphun te hi lei tha pek nghal vek an nih bakah, a hungna tha tak siamin, a tul dan anga enkawl chhunzawm zel tum a ni bawk.

Mampui Pastor Bial huap Sunday School Seminar neih a ni.

June 25 leh 26 khan Christian Education Department buatsaih in Mampui Pastor ah Sunday School Seminar neih a ni a. Training hi BCM Biak In, Mampui-ah neih a ni a, Sunday School Trainer - Upa M. Thansiama, Electric Veng, Lunglei leh Upa T Lalsangpuia Trainer, Lawngtlai  ten Seminar hi hmanpuiin Training an pe a ni. 

Property Committee-in Biak In hmun leh Ram leina tur te, Quarters sak that leh siam thatna tur ruahmanna a siam.

June 23, 2022 khan Headquarters Office, Meeting Room No.1-ah Property Department Committee Meeting neih a ni a. Tun tum meeting-ah hian kum 2022-2023 Budget atang-in Biak In hmun leh ram leina tur te, Quarters sak that leh siam thatna tur atana sum pek dan tur ruahmanna a siam a.

ṬKP Chandmary Unit Lawngtlai te'n Blood Donation Camp an buatsaih

June 25, 2022 (Inrinni) khan Ṭhalai Kristian Pawl (ṬKP) Chandmary Unit, Lawngtlai chuan Lawngtlai Area Ṭhalai Kristian Pawl Coordination Committee-in Lawngtlai Area-a ṬKP Unit hrang hrangte thisen pek dan tur Blood Donation Calendar a siam bawhzuiin BCM Chandmary Sunday School Hall-ah blood donation camp an buatsaih a, thisen hi District Blood Bank Lawngtlai-a thawktute'n a hmunah kalin an laksak a ni.

Kohhran Upa leh Rawngbawltu Nupuite pualin Retreat neih a ni.

West Phailêng Pastor Bial chuan June 24, 2022 (Zirtawpni) khân Bialtu Pastor-te nupa, Rev. Habert Rorêlliana Sailo leh Pi Lalmuanpuii te Resource Person-a hmangin Bial chhunga 'Kohhran Upa leh Rawngbâwltu Nupuite Retreat' an nei. Retreat ah hian Bial chhunga Upa leh Rawngbawltu nupui mi 30 zet an kal khawm a ni.

KNP Trainer tur mi 13 ruat thar an ni.

Fellowship Department chuan Aizawl Area, Lawngtlai Area leh Headquarters Area atan Kristian Naupang Pawl Trainers a ruat fel leh ta a, a tul angin Bial leh Unit ah te KNP Hruaitu Seminar leh Training hrang hrangah hman theih an ni ang.