Thursday, August 11, 2022

Evangelist te Rawngbawlna

 Tun kar liamta-a BCM recognized Evangelistic Team rawngbawlna nei te leh tuna la nei mek kan hriat theih te kan han tarlang ang e.

Mission rawngbawlna

#Zotlang, Lunglei huam chhunga Muslim Bengali Mistiri leh helper te pualin Crusade neih a ni
August 8-10, 2022 chhung khan BCM Zotlang North Mission Committee bultumin Zotlang a Muslim Bengali Mistiri leh helper te pualin Crusade neih a ni a. Speaker-ah Rev. Israel Lalremtluanga, Director, Baptist Masihi Mission hman a ni a, Baptist Masihi Evangelist ten an tawiawm bawk. He Crusade-ah hian mi 16 vel kalin, zan lamah hun hmanpui thin an ni.

North East India Christian Council Execitive Committtee Meeting neih a ni.

August 10, 2022 Nilaini khan North East India Christian Council (NEICC)  Executive Committee Meeting chu NEICC Office,  Platinum Jubilee Hall,, Shillong ah neih a ni a, he meeting ah hian Rev. R.Lalnunzira, Associate General Secretary Service chu NEICCD President a nihna anga a tel bak ah, BCM aiawhin Rev. ZD Rodingliana, Director Christian Education, Worship leh Fellowship Department a tel bawk. Meeting hi President in kaihruaiin, General Secretary Rev. Dr. Ramengliana hnen atangin report ngaihthlak a ni.

Phuaibuang Pastor Bial KNP Inkhawmpui vawi 30-na neih a ni.

Aug, 6-7, 2022 khan "Lalpa Thu sawi rawh, i chhiahhlawhin a ngaithla e” I Samuela 3:9 tih thupuia hmangin Phuaibuang Pastor Bial KNP Inkhawmpui vawi 30-na BCM Biak In Phuaibuang-ah neih a ni a. Speaker ah hian tunlaia Pathianin thalai te zinga a hman mek, BCM Aizawl West ami Stephen Lalruatfela, Krista Thawhpuitute Team Speaker chu hman a ni. 

Wednesday, August 10, 2022

North East India Harvest Network atanga Hriattirna leh Ngenna

India ram Independence Day 75-na pualin North East Harvest Network chuan India ram leh North East India pualin Tawngtai khaidiat a buatsaih dawn a. He Tawngtai Khaidiat hi August 15(Thawhtanni) zing dar 7:00 atanga tannin zan dar 9 thlenga neih tura ruahman a ni a, Zoom Cloud Meeting kaltlang neih tur a ni. NEI Harvest Network Director, Rev. PC Muanthanga chuan Kohhran hote he tawngtai khaidiat hi kan remchan dan anga lo zawm theuh turin min sawmin min ngen a. A hnuaia Meeting ID leh Password tarlan hmang hian Kohhran hote a thei apiang lo zawm theuh turin kan in hriattirin, kan in ngen a ni e.

Assembly Executive Committee Meeting neih hun chhung tur tihdanglam a ni.

Assembly Executive Committee Meeting, August 24-a neih tur atan Department hrang hrang leh Office te inbuatsaihna a kal mek a, tun tum Executive Committee chungchangah hian Administrative Committee chuan Agenda te leh report hrang hrang te a zirchian hnuah, ni hnih awh tura ruahmanna awm sa chu ti danglamin ni khatah zawh hman turin a rel a. Meeting neihna hmun tur chu BCM Hall, Headquarters Office, Serkawn a ni ang a, August 24, 2022, chawhma dar 10:30 ah Meeting hi tan a ni ang.

Champhai Bial leh Bethel Bial ten Upa leh Rawngbawltu Retreat an nei.

Champhai Pastor Bial huaihawtin August 6, 2022 (Inrinni) khan Champhai Pastor Bial leh Champhai Bethel Pastor Bial huam chhunga Upa leh Rawngbawltu te pual in BCM Biak In, Kahrawt, Champhaiah-ah Retreat neih a ni.

Tuesday, August 9, 2022

Lawngtlaiah Communications Campaign neih a ni.

August 7, 2022 (Pathianni) hmang khan BCM Communications Department hma laknain, Lawngtlai-ah Communication Campaign neih a ni.

TKP Chamari Unit, Lungleiin thisen unit 19 an pe:

August ni 6 (Inrinni) khan, TKP Chanmari Unit, Lunglei pawhin MTKP Blood Donation Calendar a siam angin Civil Hospital Blood Bank ah thisen an pe a, thisen pe tu zawng zawng hi mi 19 niin Mipa 17 leh hmeichhia 2 an ni.




Monday, August 8, 2022

Christian Hospital Report: July 2022.

Director, Medical & Health Department report in a tarlan dan in-  July 2022 chhungin Christian Hospital Serkawn-ah damlo 1683 in entirin, an zinga 256 admit an ni a, nau piang 32 an awm laiin mitthi 6 an nei thung. Report kimchang hetiang hi  a ni.

BCM Choir 2022-2025 lakluhna Inkhawm neih a ni.

August 7, 2022 (Pathianni) khan 2022-2025 term atana BCM Choir member thar te lakluhna Inkhawm BCM Biak In, Chanmari, Lunglei-ah neih a ni a. Inkhawm hi Rev. ZD Rodingliana, Director, Worship Department-in a kaihruai a, Rev. R. Lalbiakliana, General Secretary-in BCM Zaipawlte lakluhna nei in Pathian hnena hlanna a nei a, fuihna thuchah a sawi nghal bawk. BCM Choir 2022-2025 atana lakluh te hi mi 23 ni in:

ȚKP Mission Vengthlang Pastor Bialin thisen Unit 41 an pe

August 6, 2022 (Inrinni) khan Aizawl Area ȚKP Coordination Committee in Blood Donation Calendar a siam zulzui in ȚKP Mission Vengthlang Pastor Bial ten BCM New Secretariat Complex Kohhran Hall-ah Synod Hospital Durtlang, Aizawl Blood Bank tan thisen Unit 41 an pe. Thisen pekna a kal zawng zawng te hi mi 108 ni in, Mipa 33 leh Hmeichhia 8 ten thisen an pe a ni.


BHSS-in Gospel Meeeting an nei.

Baptist Higher Secondary School, Serkawn chuan  August 3-5 chhung atang khan BCM Biak in Serkawn ah Gospel Meeting an nei a. Speaker-ah Rev. R. Lalnunzira, AGS – Service leh Upa R. Laldinliana, Sethlun te hmangin, AGS hian Nilaini leh Zirtawpni-ah te thuchah a sawi a, Upa R. Laldinliana hian Ninganni-ah hun a hmanpui a, Zrtawpni chawhnu-ah Praise & Worship hun hmanhin kham lo takin an tin ta a ni.