Kohhran Upa Exam result tih chhuah a ni ta.

 Vawiin September 27, 2022 zing dar 10:00 khan  BCM Hall Serkawnah kum 2022 Kohhran Upa exam Result Puan a ni a. Rev. Vanlalmuankima, Director, Pastoral Department-in kumina Kohhran Upa Exam dinhmun tlangpui report pe-in  Rev. R. Lalbiakliana, General Secretary-in Result puanna hi a nei a, Lawmthusawi tawngtaina-in a khar nghal a ni. Tun tuma result tihchhuah a nih rual hian a hmu tur ten an hmuh vek theih nan a soft copy-a buatsaihin thawnchhuah nghal a ni bawk. 

Mission Rawngbawlna Chanchin

Baptist Masihi Sangati Inkhawmpui kham lo takin an tiak ta

September 16-19, 2022 chhung khan Baptist Masihi Sangati Inkhawmpui chu Mizoram Baptist Kohhran Biak In, Lamthuamthum, Haulawngah neih a ni a. He Inkhawmpui chhim hian Mizoram hmun hrang hrang a Baptist Masihi Sangati member  405 zet an kal a ni.

Baptist Covid Care Centre khar hlen tawh tura rel a ni.

BCM Administrative Committee September 14, 2022-a thukhawm chuan Baptist Covid Care Centre (BCCC) leh Covid Relief Fund kalzel dan tur chungchang a ngaihtuah a, "October 1, 2022 atanga khar hlen tawh ni se" ti in a rel. 

R&D Committee in Pithapuram Andhra Pradesh-a Nurse zir tur a la

Relief & Development Department Committee, September 16, 2022 a thukhawm chuan General Nursing & Midwifery (GNM) leh Bachelor of Science (BSC) Nursing , Pithapuram Andhra Pradesh a zir tur in hengte hi a la:-

Probationary Pastor ten Exam an nei.

Probationary Pastor kum khatna atanga kum thumna hmang mek te chuan tunkar Ningani, September 14, 2022 khan Sap Upa leh Pu Buanga Hall, Serkawn-ah Exam an nei a. Probationary pastor exam beitu te hi kum khatna hmeng mek mi 5, kum hnihna mi 12 leh kum thumna mi 5, an vaiin mi 22 an ni.

BCM Headquarters Office a thawktute pualin Mizo Tawng Seminar neih a ni.

Baptist Puplication Board buatsaihin tunkar Ningani, September 15, 2022 chawhnu dar 1:00 khan BCM Hall, Headquarters Office, Serkawn-a thawktute pualin Mizotawng hman chungchang inzirtirna ‘Mizo Tawng Seminar’, neih a ni a. Seminar ah hian BCM Office-a thawktu tel tura ruat leh Publication Board member leh Proof readers te mi 30 chuang an tel a ni.

HATIM-ah thlarau lama intuai thar lehna hman mek a ni.

September ni 16, zirtawpni atanga tan in, Higher and Technical Institute, Mizoram ah thlarau lama intuai thar lehna (Spiritual Nurturing Programme) hman mek a ni a. Rev. Dr. R. Lalthanmawia, AGS-Mission chu speaker ah hman a ni a, thupui atan 'I ram lo thleng rawh se' (Matthaia 6:10) tih hman a ni. 

Mission Rawngbawlna Chanchin thar

Bethel Baptist Mission School, Dhubri ah Gospel Meeting neih a ni.

September 8&9, 2022 khan Bethel Baptist Mission School, Dhubri-(Assam) chuan Zirlaite pualin 'Formation Week' (Gospel Meeting) an nei a. Speaker-ah Rev. K. Lalnunsanga, Regional Director, Guwahati hman a ni.

BEM Malaysia, Pastor Conference hmanpui-a kal President leh AGS Mission te tluang takin an lo thleng.

Rev. Dr. R. Zolawma, President leh Rev. Dr. R. Lalthanmawia, Associate General Secretary-Mission - te Borneo Evangalical Mission, Pastors' Conference, Miri, Malaysia-a Speaker leh Resource Person-a kal te chu tunkar Thawhlehni, September 13, 2022 khan tluang takin Mizoram an lo thleng ve leh ta. He hunah hian President leh AGS Mission te hian Pathianthu (Sermon) bakah BCM kalphung leh inenkawl dan te, Mission rawngbawlna kalpui dan te Seminar paper present in, sawihona leh zawhna leh chhanna hun te hman nghal a ni.

TKP Gilead Unit in AICS Zirlai Exam tura inbuatsaih mek te ei tur an buatsaih sak.

Tunkar ningani, September ni 15 atang khan Academy of Integrated Christian Studies (AICS)-a zirlai te chuan first semester exam an tan a. Exam tan hma zan, september ni 14 khan TKP Gilead unit, Ramrikawn, Aizawl (Tanhril Road) te chuan AICS zirlai exam tura inbuatsaih mek te hi an duhsakna leh an ngaihsakna entir nan hnatlang nei in a thlawnin an ei tur an buatsaih sak a, AICS zirlai te leh zirtirtu te an lawm hle a, AICS mipa Hostel enkawltu Rev. H. Ramthianghlima leh hmeichhe hostel enkawltu Pi Lalremruati Rokhum te chuan TKP Gilead unit te hnenah hetianga an duhsakna leh ngaihsakna zirlai te chunga an lantir avang hian lawmthu an sawi. 

Education Department hotu te leh HATIM Zirtirtu ten inkawmhona hun an hmang.

September 13, 2022 (Thawhlehni) khan Higher and Technical Institute, Mizoram a zirtirtu te leh Education Departemnt hotute chuan HATIM hmalam hun thlirna leh hmasawnna tura ruahmanna te sawi hona hun Meeting Hall, HATIM Campus Kawmzawl ah an nei a. He hun ah hian Education Department hotu te atangin Rev. R. Lalnunzira, AGS-Service leh Rev.L. Vanlalsanga, Director, Education Department te an tel a, HATIM atangin Principal Pu V. Vuansanga leh zirtirtu exam veng laklawh lai tih loh te chu an tel kim a ni.  

MTKP 'Youth Centre' Sakna tur Ram inhlanna neih ani.

Kar hmasa Zirtawpni, September 9, 2022 khan BCM Property Department hotute leh Mizoram Thalai Kristian Pawl hruaitute chuan General Secretary Office-ah MTKP Youth Centre sakna tur Ram Pass inhlanna an nei a. Rev. R. Lalbiakliana, General Secretary chuan Zobawka BCM ram, Biak In sakna tura lo ruahman chu MTKP Youth Centre sak nan hlan remtih a nih thu sawiin, MTKP ten tangkai taka an hman theih nan MTKP Secretary Rev. F Zorinkhuma hnenah LSC a hlan a, hemi rual hian MTKP lam hian Zobawka Biak in sakna tur Ram leina atana an thawh cheng nuai 6 an hlan ve thung a ni.

KNP rawngbawlna

Ramlaituiah KNP Camping neih a ni.

Fellowship Department Headquarters leh Ramlaitui Kohhran te ruahmanna in September 9-11 khan Tv. Zonunsanga, KNP Trainer Speaker-a hmang in, Ramlaitui ah KNP te pual in Camping neih a ni a. Zirtawpni leh Inrinni nilengin Camping programme hi  hman a ni a, lang Camp a nih ang in zan lamah hun hmang lovin chhun ah chauh hun hi hman thin a ni a. Zan lam ah chuan Beirual Programmme Tualchhung kohhran in a hmang thin a ni. Camping ah hian KNP member 70 vel an kalkhawm a ni. Pathianni zing leh zanah te Camp Follow-up neiin Kohhran pum huapin chhunzawm a ni bawk.

BKHP Ebenzer Unit, Zobawk-in Golden Jubilee an lawm.

Kar hmasa Zirtawpni, September 9, 2022 khan BKHP Ebenezer Unit, Zobawk chuan an Unit dinchamphaphak vawi 50-na (Golden Jubilee) lawmin nilengin hun an hmang a. Jubilee thupuiah “Hei leh chen hi LALPA’N min hruai a ni” (I Samuel 7:12) tih chu hman a ni. Jubillee hi MBKHP hruaitute President Pi Pc Lavohbiki, Fin.Secretary Pi F. Zanguri, Treasurer, Dr. Zoramthangi, Fin.Secretar  leh Pi H. Lalkimi, Executive Committee Member ten an hmanpui.

Area Development Working Committee neih a ni

September 9, 2022 (Zirtawpni) khan Area Development Working Committee Aizawl chuan Executive Secretray Office Meeting Hall, Baptist House, Upper Khatla-ah meeting neiin member 15 an tel. Rev. JC. Vanlalluaia Chairman, Area Development Committee Aizawl in Meeting hi kaihruaiin Rev. R. Lalrintluanga Secretary in report a pe.

Christian Hospital Report

Director, Medical & Health Department report in a tarlan danin-  August 2022 chhungin Christian Hospital Serkawn-ah damlo 1800 in entirin, an zinga 291 admit an ni a, nau piang 40 an awm lai in mitthi 6 an nei thung. Report kimchang hetiang hi a ni:-

President leh AGS Mission te Malaysia-ah Pastor Conference hmanpuiin a thang mek.

Borneo Evangalical Church (BEC), Malaysia te chuan Miri, Swarak hmunah "Mission Conference" neiin, he conference hi an kohhran Pastors & Missionary te puala buatsaih a ni. Mission Conference ah hian Baptist Church of Mizoram (BCM) President Rev. Dr. Zolawma leh Associate General Secretary-Mission Rev. Dr. R. Lalthanmawia te chu Speaker leh Resource Person atana an sawm angin an kal.

TKP Electric Veng Unit, Lawngtlai ten an Rising Day Pualin Thisen an pe.

September 7, 2022 (Nilaini) khan Ṭhalai Kristian Pawl, Electric Veng Unit, Lawngtlai chuan an kum 36 tlinna (Rising Day) pualin Electric Veng Kohhran Hall-ah thisen an pe a. Thisen hi District Blood Bank, Lawngtlaia thawktute'n a hmunah kal in, an laksak a ni. Thisen petute hi mipa 27 leh hmeichhia 6 niin thisen unit 33 an pe a ni.

Mission Rawngbawlna Chanchin thar

Baptist Masihi Inkhawmpui atan inbuatsaih mek

September 16-19, 2022 khian Baptist Masihi Inkhawmpui chu Mizoram Baptist Kohhran Biak In, Lamthuamthum, Haulawngah neih a ni dawn a. He Inkhawmpui chhim tur hian Mizoram hmun hrang hrang a Baptist masihi member te leh Fellowship te an in  buatsaih mek a. Baptist Masihi Director Rev. Israel Lalremtluanga leh a dawltu, BCM Lamthuamthum te chuan Kohhran member a thei apiangin tawiawma, telpui turin a sawm a ni.

Baptist Masihi Inkhawmpuina tur : BCM Biak In, Lamthuamthum, Haulawng

Kohhran Upa Exam neih a ni:

Kar hmasa Zirtawpni, September 2, 2022 khan Mizoram Baptist Kohhran chuan Pastor bial tinah bialtu pastor-te kaihhruaina-in Kohhran Upa Exam a buatsaih a.  Kuminah hian Pastor Bial 67 atangin Kohhran Upa atana thlan tlin mi 165 an awm a ni.  

District Jailah Bible ngaihthlak theihna khawlte (Talking Bible) sem a ni.

Bretheren Fellowship leh Layman Evangelical Fellowship te chuan Jail tang te Pathian thu ngaihthlakna atan Bible tawng thei (Talking Bible) chu District Jail, Lunglei-ah an pe. He Bible hi mobile phone tiat lek Genesis atanga Thupuan thleng Mizo tawnga ngaihthlak tura buatsaih a ni a. 

Mizoram Police Southern Range hnuaia Police te pual Detoxification and Rehabilitation Camp chu khar a ni.

September 4, 2022 (Thawhtanni) khan Home Ministry, Mizoram leh Mizoram Baptist Kohhran thawhhona-in Mizoram Police Southern Range hnuaia Detoxification & Rehabilitation Camp kharna inkhawm,Recreation Hall 2^nd Bn. MAP Headquarters, Luangmual, Lunglei ah neih a ni a, Rev. Vanlalmuankima, Director, Pastoral Ministry leh Rev. H. Lalfakzuala ten an telpui.

Aizawl Area BKHP CO-Ordination Joint Fellowship Vawi 1-na neih a ni.

September 3, 2022 (Inrinni) ni leng khan Aizawl Area BKHP CO-Ordination Joint Fellowship Vawi 1-na chu BCM Biak In Republic Vengthlang-ah neih a ni a. AIzawl Area chhung atangin BKHP member 747 an kal khawm.

ȚKP Vaivakawn Unit leh Republic Vengthlang Pastor Bial ten Thisen an pe.

September 3 2022 (inrinni) khan ṬKP Vaivakawn Unit, Aizawl te chuan an Unit Dinchamphaphak (Rising Day) Vawi 17-na (4th September) pualin Civil Hospital Aizawl Blood Bank-ah a mamawh apiangte hman atan thisen unit 13 an pe a, mipa 10 leh hmeichhia 3 ten thisen hi an pe a ni. 

Lunglei Khawpui Chhung BMP Unit hrang hrang te huap in BMP din chhan Campaign neih a ni.

Mizoram BMP Rorelna-in Pastor bial hrang hrangah BMP dinchhan campaign neih ni se ti-a a rel bawhzuina kal zelah Lunglei Khawpui chhunga Bial leh Unit hruaitute pualin September 4, 2022 (Pathianni) Chawhnu dar 2:00 khan BCM Hall, Serkawn-ah BMP din chhan Campaign  neih a ni. 

Ram pum huap Chawnghei tawngtai neih a ni.

Kumin 2022 Assembly thurel ‘Ram pum huap Chawnghei tawngtai neih ni se” tih thu bawhzuiin September ni 4 tlai dar 4:30 khan Mizoram Baptist Kohhran Tualchhung kohhran hrang hrang ah Rampum huap Chawnghei tawngtai neih a ni.

Vawiin chawhnu dar 2:00 khan BCM leh Champhai Grape Grower Society te chuan inremna thuthlung (MOU) an ziak thar.

Mizoram Baptist Kohhran chuan kohhran serh leh sang pawimawh tak Lalpa Zanriah buatsaihna Sacramental wine siam chhuah chungchangah Champhai Grape Grower Society nen November 11, 2016 khan thawhhona thuthlung (MoU) siamin, hetatang hian Champhai Grape Grower Society te siam chhuah zel hi Sacramental Wine atan hman a ni a. Mizoram Baptist Kohhran chuan kan ram thar chhuah leh siam ngei Sacramental wine atana hman chhunzawm zel chu tha a ti a, vawiin, September 6, 2022  chawhnu dar 2:00 khan Winery Packing Hall, Champhai Winery, Tlangsam-ah Inremna (Memorandum of Understanding) hi pawl pahnih te hian an an ziak thar leh ta a ni.

MoU ziak tharna inkhawm hi Pu HS Vanlalfakzuala, Chairman, Champhai Grape Grower Society in a kaihruai a, Rev. PC Lalropuia, Bialtu pastor Champhai Pastor Bial-in Pathian hnena inkawltirna hun hmangin, Pu C. Zohmingliana, General Secretary, CGGS in Report a pe a.  Pu C. Lalremsiama, Jt .Director, Horticilture Dept. leh BCM General Secretary Rev. R. Lalbiakliana ten thu an sawi hnuah MoU sign a ni.

 

MoU hi kum 2 chhung atana ziak phawt a ni a, Sacramental Wine bottle khat hi 750ml niin, a man hi Rs. 140 a ni. Excise duty, Road Tranport leh Permit te Baptist Church of Mizoram in a buaipui ang. Sacramental wine quality; Bottle, Colour, Acidity, Taste leh a rim te hi MoU ziaktu te pahnih remtihna tel lovin tih danglam theih a ni lo vang. Kohhran dangte pawhin he sacramental wine hi an hmang ve duh a nih chuan General Secretary BCM hnenah emaw, General Manager, CGGS hnenah emaw an thlen ang a, Party pahnih te remtihna in an hmang thei ang.

 

MoU Sign fel a nih hnu hian Sacramental Wine Bottle 600 chu BCM Tualchhung Kohhran hrang hranga hman turin phurh nghal a ni.

Rampum Huap Chawnghei Tawngtai Zawm Tura Ngenna

Kumin 2022 Assembly-in a rel ang in tun Pathianni September ni 4 tlai dar 4:30 hian 'Rilru leh thlarau lamah harh tharna kan lo chan theih nan' Mizoram Baptist Kohhran Tualchhung kohhran tin ah Rampum huap Chawnghei tawngtai neih tur a ni a.

Baptist Printing Press khawl thar – Gathering Machine hlanna neih a ni.

September 1, 2022  (Ningani) khan Baptist Printing Press, Serkawn Khawl thar – “Gathering Machine” chu Pathian hnena hlanna Inkhawm tawi neih a ni a. Inkhawm hi Rev. Dr. Lalzarliana, Director, Literature & Printing Department-in a kaihruai a, Upa K. Lalnuntluanga, Manager, Baptist printing Press-in Khawl thar an neih dan leh a khawl dinhmun tlangpui report a pe. 

MBMP Executive Committee Meeting neih a ni.

Tunkar Thawhlehni, August 29, 2022 khan Mizoram Baptist Mipa Pawl (MBMP) Executive Committee Meeting chu Sap Upa leh Pu Buanga Hall, Serkawn-ah neih a ni a. Meeting hi Rbt Chawngrolura, MBMP President-in a kaihruai a, Rev. H. Lalfakzuala, Secretary MBMP-in report a pe.

Chartered Accountant ten BCM Accounts an Audit mek.

August 27, 2022 (Inrinni) atang khan Chartered Accountant te chuan BCM sum vawn dan endikna (External Audit) an nei mek a. Ruahman dan chuan tunkar hian zawh hman beisei a ni. 

Mission Rawngbawlna Chanchin

Hnahthial ‘S’ Bial-ah Mission Convention neih a ni.

August 27-28, 2022 (Inrinni leh Pathianni) hmang khan Hnahthial South pastor Bial Mission Committee hmalakna-in Bial huap Mission Convention, BCM Peniel-ah neih a ni a. Speaker-ah Rev. Dr. R. Lalthanmawia, AGS Mission chu hman a ni.

Republic Vengthlang Bial KNP Inkhawmpui Vawi 6-na neih a ni.

August, 27&28 2022 hmang khan BCM Republic Vengthlang Bial KNP Inkhawmpui vawi 6-na BCM Biak In, Republic Vengthlang ah neih a ni a.   Inkhawmpui ah hian thupui atan Rom 13:11 ‘Tunlai thil awmzia’ tih hmang in, Speaker atan Bialtu Pastor Rev. JC Vanlalluaia hman a ni.

General Secretary, Director, Pastoral Department leh Property Department hotu te Aizawl leh Kolasib Bial tlawh in an kal

August 27 leh 28 hmang khan Rev. R. Lalbiakliana, General Secretary, Rev. Vanlalmuankima Director, Pastoral Department leh Pu Lalramchhana Junior Engineer, Property Department te chu Aizawl leh Kolasib Pastor Bial tlawhin an zin chhuak. 

MBKHP Hruaitu ten BKHP Chawngte L Pastor Bial an tlawh.

August 27 leh 28, 2022 hmang khan MBKHP Hruaitu ten BKHP Chawngte 'L' Pastor Bial an tlawh a, MBKHP hruaitute Pi Lalvohbiki, President leh Executive Committee member te - Pi Lianropuii leh Pi C. Zonunsangi te an kal. 

Mizoram hmun hrang hrang-ah 'BMP Dinchhan Campaign' neih a ni.

August 28, 2022 (Pathianni) hmang khan Mizoram BMP Hruaitute chu Pastor Bial hrang hrang-ah BMP Dinchhan Campaign neiin  an fehchhuak a, Pathinni zing inkhawm leh chawhnu Inpawlhona neihpuiin, hun tha tak an hmang a ni.

BYFI Executive Committee Meeting MTKP Secretary a kal.

August 30, 2022(Thawhlehni) khan Nagaland House, Kolkata-ah Baptist Youth Fellowship of India (BYFI) Executive Committee Meeting neih a ni a. He meetingah hian Mizoram ṬKP aiawhin Rev. F. Zorinkhuma, Secretary MṬKP  a tel. 

Worship Training hmun hrang hrangah neih a ni.

Worship Department-in Worship Trainers a ruat te chuan tun hnaiah Pastor Bial leh Tualchhung Kohhran hrang hrang ah worship Training nei in an fehchhuak a. Worship Training-ah hian Pathian Biak Inkhawm chungchang te, Inkhawm kaihhruai dan te leh Inkhawm zai hruai leh hla hril chungchang te, Music lama hmasawnna tur te zirtirna neih thin a ni. Hetiang hi tunhnaia Worship Training neihna hmun leh Trainers te kal dan a ni:

Aizawl East Pastor Bial ah Senior 'A' leh Intermediate Meet neih a ni.

Aizawl East Pastor Bial Sunday School Committee buatsaih in 28 August, 2022 (Pathianni) nileng khan BCM Biak In, Chanmari-ah Senior 'A' leh Intermediate Meet hman a ni a, bialtu Pastor Rev. C. Chhuntluanga Speaker atan hman a ni.

ṬKP Rahsiveng Pastor Bial leh ṬKP Theiriat Pastor Bial ten Joint Fellowship an nei.

August 28, 2022 Pathianni chawhnu khan BCM Gilgal, Theiriat ah ṬKP Rahsiveng Pastor Bial leh ṬKP Theiriat Pastor Bial te chuan Joint Fellowship an nei a, Bial pahnih atangin member an kal tha hle a, fellowship hlimawm leh hlawkthlak tak an hmang a ni.

TKP Hnahthial North Pastor Bial-in Crusade an nei.

Rev. F. Zorinkhuma MṬKP Secretary Speaker a hmangin ṬKP Hnahthial North Pastor  Bial te chuan 26th - 28th Aug, 2022 chhung khan BCM Biak In Electric North-ah Crusade an nei a. Thupui atan "Thih Thlenga Rinawm" (Thupuan 2:10) hman a ni. 

Tunkar Ningani zan atang hian Beirual Programme hman tan a ni dawn

September (beirual thla) kan chuangkai dawn a, kum dang ang bawkin September 1 atang hian Tualchhung kohhran hrang hrang ah Beirual Programme hman a ni dawn a. Thla chawhma lamah Beirual thuzir zir in hun a hman a ni ang a, “Krista Rilru” tih Rev. David Lalmalsawma Sailo ziak zir a ni ang.

Zemabawk Pastor Quarters thar Pathian hnena hlanna hun hman a ni

August 26, 2022 Dar 4:00 Pm khan BCM Zemabawk Pastor Quarters thar Pathian hnena hlanna neih a ni a. Pastor Quarters hlanna hun tawi hi Rev. C. Lalremmawia Bialtu Pastor in hruaiin,  Upa. Lamuansanga Hnamte,  Bial Secretary in report a pe. Rev R. Lalbiakliana, General Secretary in Pastor Quarters thar hi hawng in Pathian hnenah a hlan a, Rev. Vanlalmuankima, Director Pastoram Ministry Department in malsawmna in quarters hlanna inkhawm hi a khar a ni.

ṬKP Aizawl East Pastor Bial-in Chawnghei Tawngtai an nei.

ṬKP Aizawl East Pastor Bial te chuan August 21 Pathianni tlai khan bial ṬKP rorel bawhzuiin bial huap chawnghei ṭawngṭai hun in ang ah an hmang. He hunah hian bial ṬKP OB te chu unit paruk ah insemdarhin hun an hmanpui a ni.

Assembly Executive Committee Meeting Neih a ni.

August 24, Nilaini khan Assembly Executive Committee Meeting, BCM Hall Serkawn ah neih a ni a, Meeting hi Rev. Dr. R.Zolawma President in kaihruai in Report General Secretary, Rev. R. Lalbiakliana hnen atangin   ngaihthlak a ni.

Headquarters Area Pastor te pual in Nikhat Awh Intawhkhawmna neih a ni.

Pastoral Department buatsaih in August ni 25 khan Headquarters are huamchhunga Pastor, Pro-Pastor leh Ordain minister te pualin Pastor te Intawhkhawmna neih a ni a. He hunah hian Headquarters Office-a Ordian minister te leh Headquarters Area-a Bialtu Pastor leh Pro-Pastor te mi 70 an kal khawm a ni.

BCM Thlakip Chhuak Chanchinbu Hrang Hrang Kalphung Chungchanga Inrawnkhawmna neih a ni.

August 23, thawhlehni chawhma dar 11:30 khan thlakip chhuak kohhran chanchinbu hrang hrang; Kohhran Beng, Missionary Tlangau, Loisi, Thalai Entu leh Naupangte Thian chungchanga inrawnkhawmna, BCM Hall, Serkawn-ah neih a ni. 

ṬKP Pangzawl Pastor Bial Meet neih a ni.

August 19-21,2022 chhung khan Pangzawl Pastor Bial TKP chuan BCM Biak in, Venghlun, Pangzawl-ah 'Boralte zawnga chhandam' (Luka 19:10) tih thupui hmangin Bial TKP Meet an nei a, Speaker ah Upa PC Vanlalrova, Senior Adviser MTKP chu hman a ni.

Hnahthial, Leite leh Rotlang East ah Communications Department Campaign neih a ni

August 21, Pathianni khan Hnahthial khawchhunga tualchhung kohhran 7 - Electric, Electric North, Bazar, Venglai, Kanaan, Peniel, Lungleng leh Leite leh Rotlang East kohhran ah te Communications Department atanga tih chhuah Kohhran Beng leh Baptist Today Campaign neih a ni. 

Mission Rawngbawlna Chanchin

#Arunachal Pradesh, Adi Galo Hnam zinga Ringthar Tlemna khua ah beihpui thlak a ni.

August19-20 khan Galo Baptist Union Evangelist Team mi 10 te chu mission in charge Pu C. Pachhunga Missionary leh TV C.Vanlaltlanchhuaha Missionary te kaihhruainain ringtu awm tlemna khua 'Ligo' khuaah beihpui thlakin 'Outreach Programme' an hmang.

Serte Pastor Bial TKP Inkhawmpui neih a ni.

ṬKP Serte Pastor Bial chuan  August ni 19-21, 2022  chhung khan "Krista ta" (1 Kor. 3:30)-tih thupuia hmangin Bial ṬKP inkhawmpui, BCM Biak In, Vanhne-ah an nei a. Speaker atan Rev.F.Zorinkhuma, Secretary-MṬKP hman niin Speaker hi Ṭhalai Entu Editor Rbt.LH.Lalhmangaiha bakah, MṬKP Executive Committee Member dang Rbt.F.Lalrinzuala leh Nl.Grace Lalrindiki ten an ṭawiawm a ni.

Bawngkawn leh Thuampui Pastor Bial TKP ten a mamawh te tan thisen unit 126 an pe.

August 20, inrinni khan  Aizawl Area ȚKP Co-ordination Committee in Blood Donation Calendar a buatsaih bawhzuina in, ȚKP Bawngkawn Pastor Bial te chuan Bawngkawn Kohhran Hall ah Thisen Unit 100 an pe. 

BES, Serkawn in Class Room zirna Pawnlam Thiltih (Co-Curricular Activity) hun an hmang.

August 19, 2022 Zirtawpni khan Baptist English School Serkawn chuan Class room zirtirna pangngai piahlam thil pawimawh zirna hun, Co-Curricular Activity, BCM Hall, Serkawn ah an nei a. Hetah hian 'Social Media leh Zirtirna Dik' tih chungchang zirtirna hun hman a ni a. 

Executive Secretary Aizawl leh Aizawl Khawpui chhunga Kohhran hruaitu ten Champhai leh a chhehvel Kohhran te a tlawh.

August 17-19 khan Rev. R. Lalrintluanga, Executive Secretary, Aizawl leh Aizawl Khawpui chhunga Bialtu pastor thenkhat Rev. K. Lalbiakchhawna, Bawngkawn  Bial, Rev. V. Laltlanzuala, Mission Vengthlang Bial, Rev. T. Lalsangvunga, Central Bial, Rev. T. Lalawia, Luangmual Bial te leh Upa H. Lalmuankima, Secretary, Aizawl East ABC leh Aizawl ES Office atangin Upa F. Hranglawma, H.A, Tv. F. Lalrammawia, Production Assistant leh Driver Pu J. Lalramliana te chu Champhai leh a chhehvel kohhran hrang hrang te tlawhin an fehchhuak a.

 

Rbt. R. Malsawma, Krista Thuhriltu Team Speaker chuan August 15 khan chatuan ram a pan ta.

BCM Recognised Evangelistic Team, Krista Thuhriltu Team-a Speaker Rbt. R. Malsawma chu Cancer natna avangin Tunkar Thawhtanni, August 15, 2022 zan dar 7:50 khan a boral a. A tuk, August 16 (Thawhlehni) chhun dar 12:00 ah Bialtu Pastor Rev. Lalchhuankima’n vuiin ropui taka thlahliam a ni ta. Evangelist R. Malsawma hian a nupui Pi Roseline-i leh an fate mipa pahnih leh hmeichhia 3, naupang te te a kalsan a ni.

New India Literacy Programme kalpui dan tur sawipuiin Mizoram Sorkar Education hotu ten BCM hruaitute an kawm.

August 11, 2022 (Ningani) chawhnu khan Mizoram Sorkar-a Education Department hotute, DEO Lunglei, Dy. Director, Samagra Shiksha, Mizoram leh DPC te leh Deprtment hotu dang te chu BCM Headquarters Office, Serkawn-ah lengin BCM hotute an hmu a. BCM hruaitute - General Secretary, AGS Mission, leh Education Director ten lo dawngsawngin inkawmhona hun tha tak an nei.