Mission rawngbawlna Chanchin

Kawrthah Pastor Bial-ah Mission Convention neih a ni:

August 13-14, 2022 chhung khan BCM Kawrthah Tualchhung Mission Committee buatsaih in, thupui “Chanchintha hi hril rawh u” Marka 16:15 tih hmang in Mission Convention an nei a. Speaker-ah Rev. Lalremsiama Ralte, Mission Director hman a ni. Speaker hi a nupui Pi C.Lalzirliani, zaithiam Rebek Lallawmzuali leh Rbt. Thansanga, Lunglawn leh Driver Rinpuia ten an ṭawiawm a ni.

Convention chhung hian Speaker kal tlang hian thuchah ropui tak tak ngaihthlak a nih bakah zaipawl, BMP, KNP,  Kohhran Zaipawl leh Nl. Lalngaizuali te hnen aṭangin zai ngaihnawm tak tak ngaihthlak thin a ni.

Rev. Lalremsiama Ralte hian Mission Convention a hmanpui zawh hnu-ah Damparengpui leh Dapchhuah te tlawhin Mission School te a en nghal a, Missionary te nen inkawmhona hun tha tak an nei.

Arunchal Far East Field-ah Pa ho pual Retreat leh Thalai pual Quiz Competition neih a ni.

August 13, 2022 Inrinni khan Arunachal Far East Field a Namsai Area Mipa Pawl te pualin Retreat neih a ni a. He Retreat-ah hian Pu HC Lalramhnema leh Upa L. Dinsanga te Resource Person leh Speaker atan hman an ni. Retreat thupui atan “Inveng ula, Rinnaah chuan ding nghet ula” (I Kor.16:13) tih hman a ni.

August ni 13 vek hian, Arunchal Far East Field Meka Kohhran ah Thalaite pualin Quiz Competition buatsaih a ni a. Missionary Lalremsanga Chhangte leh Asha Garmote te chu Quiz master niin, Missionary dang ten an tawiawm bawk. Thlai ten an hlutin hun hlimawm leh hlawk tak an hmang a ni.

Arunachal East Field, Yingkiong  Kohhran ah Music Training Neih a ni.

August 12 -14 chhung  khan Yingkiong Kohhranah Music Training neih a ni a.  Pu Zaithanmawia Music Teacher chu Training petu atana hman a ni a, Thalai member engemawzat he training ah hian an tel a, hlakthlak an ti hle.