Rbt. R. Malsawma, Krista Thuhriltu Team Speaker chuan August 15 khan chatuan ram a pan ta.

BCM Recognised Evangelistic Team, Krista Thuhriltu Team-a Speaker Rbt. R. Malsawma chu Cancer natna avangin Tunkar Thawhtanni, August 15, 2022 zan dar 7:50 khan a boral a. A tuk, August 16 (Thawhlehni) chhun dar 12:00 ah Bialtu Pastor Rev. Lalchhuankima’n vuiin ropui taka thlahliam a ni ta. Evangelist R. Malsawma hian a nupui Pi Roseline-i leh an fate mipa pahnih leh hmeichhia 3, naupang te te a kalsan a ni.

Rbt. R. Malsawma hi BCM Evangelitic Team Speaker pawimawh leh rawngbawlna chelh nung reng thin a ni a. Thlaraubo vei em em leh Pathian leh a Kohhran ngaipaiwmawh leh zah em em mi a ni. Kum 1996 ah zau zawka rawng a bawl theih nan “Krista Thuhriltu Team” tih chu dinin amah hi Speaker a ni a. 1997-ah an team chu BCM-in a pawm a. He team atang hian Speaker 5 leh Pastor 1 chherchhuah niin, Kohhran upa leh rawngbawltu engemaw zat chherchhuah an ni tawh bawk.

 
Hetia hun lo taka min kalsan ta hi Mizoram Baptist kohhran chuan a uiin, a sun takzet a. A kalsan, a rawngbawlpui te, a chhungte leh Kohhran te Lalpa’n thlamuanin veng zel se tiin tawngtaina nen a thlahliam a ni.