Kar hmasa Zirtawpni, September 9, 2022 khan BKHP Ebenezer Unit, Zobawk chuan an Unit dinchamphaphak vawi 50-na (Golden Jubilee) lawmin nilengin hun an hmang a. Jubilee thupuiah “Hei leh chen hi LALPA’N min hruai a ni” (I Samuel 7:12) tih chu hman a ni. Jubillee hi MBKHP hruaitute President Pi Pc Lavohbiki, Fin.Secretary Pi F. Zanguri, Treasurer, Dr. Zoramthangi, Fin.Secretar leh Pi H. Lalkimi, Executive Committee Member ten an hmanpui.
Chawhma dar 10:00 ah Jubilee lawman Inkhawm, Biak Inah neih a ni a. Pi K. Lalnginglovi, Unit BKHP President-in inkhawm a kaihruai a. MBKHP atangin chibaibukna Pi H. Lalkimi’n a sawi a, Bialtu Pastor Rev. C. Lalbiakzuala’n thuchah a sawi. BKHP, KNP, BMP leh Kohhran Zaipawl ten zaia rawngbawlna neiin, Hruaitu hlui chawimawina leh Kaltate sunna neih niin, Jubilee thilpek hrang hrang pekna hun hawn a ni bawk. Inkhawm banah Biak In kawtah Jubilee dar vuak leh Jubilee lung phun hawnna neiin, Jubilee Cake zai a ni a, tlaiah chawhlui kilho a ni.