Kar hmasa Zirtawpni, September 9, 2022 khan BCM Property Department hotute leh Mizoram Thalai Kristian Pawl hruaitute chuan General Secretary Office-ah MTKP Youth Centre sakna tur Ram Pass inhlanna an nei a. Rev. R. Lalbiakliana, General Secretary chuan Zobawka BCM ram, Biak In sakna tura lo ruahman chu MTKP Youth Centre sak nan hlan remtih a nih thu sawiin, MTKP ten tangkai taka an hman theih nan MTKP Secretary Rev. F Zorinkhuma hnenah LSC a hlan a, hemi rual hian MTKP lam hian Zobawka Biak in sakna tur Ram leina atana an thawh cheng nuai 6 an hlan ve thung a ni.
Mizoram TKP Rorel 2022 chuan Thalaite tana intuaitharna leh programme hrang hrang hmanna tur Youth Centre din ni se tiin a rel a. Chumi bawhzuina kal zelah Zobawk-a Biak In hmun atana Kohhran ram neih sa chu Youth Centre din nan hian inbe remin hemi Biak In hmun atana tih chu hmun dang remchang zawkah lei turin ruahman a ni ta a ni.
Ram pass inhlanna hun-ah hian MTKP lam atangin Secretary leh Office Bearers dang te an tel a, Property Department atangin Property Director leh Finance Director te an tel a ni.
