Tunkar Pathianni, July 3, 2022 hi Mizoram Baptist Kohhran ni pawimawh, “Mission Sunday” a ni a. He ni hi kum tin, July Pathianni hmasa berah hman thin a ni. Kuminah pawh he ni pual hian Mizoram Baptist Kohhran chuan Programme siamin Kohhran tinah hun an hmang leh dawn a ni.
Mission Sunday-ah hian Pathianni zing Inkhawm leh Pathianni zan Inkhawmah te Chanchin Tha hril tulna leh pawimawh na lam inzirtirna thuchah ngaihthlak thin a ni a, Pathinni chawhnu lamah Inpawlhona te neiin, Kohhran tam zawkah BCM Mission rawngbawlna te thlir hovin, Mission report te ngaihthlak thin a ni bawk.
Mission Department report hnuhnung ber, June 22, 2022 Mission Board Meeting report-in a tarlan dan in Kum 2022 January – June 15 chhung hian Ringthar 881 leh Kohhran ding thar 8 an awm. Tun dinhmunah India ram chhung Mission Field 13 leh India ram pawn hmun 10 –ah Missionary leh a rammi thawktu 1109 ten rawng an bawl mek a ni.