July 7, 2022 (Ningani) chawhnu dar 1:00 khan Area Development Working Committee, Aizawl chu Eexecutive Secretary Office Meeting Hall, Baptist House, Upper Khatla-ah thu khawmin, Thingtlang Kohhran te tlawh dan tur leh Sacramental Wine chungchang te an thlir ho. Meeting-ah hian member 17 an kal a, Rev. JC. Vanlalluaia Chairman, Area Development Committee Aizawl in kaihruaiin Rev. R. Lalrintluanga Secretary in report a pe.
Secretary hnen atangin Sacramental Wine atana hman mek Champhai Grape Growers’ Society te siam chu tun hnaiah Sorkar lam hmalakna avanga harsatna awm ni a chanchinbu leh social media lama a darh nasat avangin, hemi chungchanga zawhna leh thil kalpui dan turah Chief Minister, Minister leh Sorkar a thu neitute aiawha an dawr dan leh bawhzui dan chungchang report ngaihthlak a ni a. Sorkar lam thuneitu te chuan Sacramental wine chungchangah harsatna a awm loh tur thu leh Sorkar atanga tihfel ngaite tihfel mek zel anih thu an lo hrilh tih report-ah hian a tarlang a ni.
Tun tum meetingah hian Meting hmasa thu bawhzuina Thingtlang Kohhran 43 tlawh tura ruahmanna siam chu thlirhovin pawm a ni a. Kohhran than zel dan tur (Church Growth & Expansion) chungchang ngaihtuah a ni a, hemi chungchang Administrative Committee thu chhuak nen thlir kawpin ruahmanna siam ni se tih a ni. Baptist Multipupose Centre, Falkland-a hman tur Sound System ngaihtuah ni se tih a nih bak ah Savidge Hall Baptist House, Upper Khatla tun aia hman nuam leh rem zawka siam that ni se tih te an rel bawk