Jhakhand Field-ah Biakin thar hawngin ring thar 33 an nei.
July 13, 2022 ( Nilaini) khan Dopahar, Jharkhand field-ah Biak In thar, anmahni kut kawih ngei a an sak chu Field Director Rev. K. Lalhnehliana'n a hawng. Biak In thar hawnna Inkhawm-ah hian Kohhran member 48 an awm a, Biak in hawnna inkhawma tel hi 300 vel zet an ni a, hemi ni hian Nausen 14 Pathian hnenah hlan an ni a, Ringthar 33 laiin baptisma an chang a. Biak In thar hawn ni hian member 80 chuang an lo awm ve ta a ni.
Mission Convention hmun hnihah neih a ni.
#Hnahthial North Pastor Bial chuan July
9-10, 2022 chhung khan BCM Biak In, Thiltlang-ah Mission Convention an nei a. Convention
thupui atan “Chanchin Tha hi hril rawh u’ Marka 16:15 hmangin Pu T. Ngaksanga, Mission
Promoter chu Speaker-ah an hmang a, Bialtu Pastor te chhungkua-in hun pumpui an
tawiawm thin bakah Bial pawn atangin Hnahthial ‘S’ Pastor Bial Zaipawl ten an
tawiawm bawk.
Inrinni zan, Pathianni zing leh pathianni zan-ah te Speaker hnen atangin thuchah tha tak tak ngaihthlak a nih bakah Bial Zaipawl leh Kohhran hrang hrang atangin zaipawl leh Group zai te a awm thin a. Pathianni chawhnu-ah Mission pualin Inpawlhona neih a ni a, Kohhran member 100 chuang zet an tel a ni. Fellowship ah hian BCM Mission rawngbawl dan tlangpui leh report te Speaker hian a sawi a, sawihona hun neih a ni bawk.
#BCM Zohnuai, Lunglei chuan Speaker-ah Rev. Dr. R. Lalthanmawia, AGS-Mission Speaker-a hmangin July 8-10, 2022 khan Mission Convention an nei bawk a. Zirtawp zan, Inrinni zan, Pathianni zing leh zanah te Pathian Biak Inkhawm neiin, Speaker-in thuchah a sawi a, Kphhran ten an hlutin Inkhawm boruak a tha hle. Pathianni chawhnu-ah Inpawlhona neiin Mission rawngbawlna chungchang sawihona leh zawhna leh chhanna hun te hman a ni a, Kohhran hoten hlawkthlak an ti hle.
