July 12, 2022 Thawhlehni khan BCM hruaitute leh 2nd Battalion MAP, Luangmual hotu te chuan Home Ministry buatsaih a Mizoram Police Southern Range hnuaia Rehabilitation leh Detoxification programme kalpui dan tur BCM Headquarters Office-ah an sawi ho.
Inkawmhona-ah hian BCM aiawhin Rev Dr R Lalthanmawia AGS-Mission (General Secretary Charge la mektu), Rev R Lalnunzira AGS Service, Rev Vanlalmuankima Director, Pastoral Ministry leh Rev Vanlalsanga Director, Social Concern Dept, Dr Lalramzauva Director, Medical & Health Dept, Upa RL Thianghlima Speaker Mizoram Evangelical Ministry Team te an tel a, Mizoram Police lam aiawhin Pu K Beihmotaosa MPS leh a team te an tel a ni.
He inkawmhonaah hian Home Ministry ruahmanna-a Police te taksa, rilru leh thlarau siamtharna programme ni 45 an ruahman ah BCM nena thawhho dan tur chung chang an sawiho a ni. Ni 45 chhung-ah hian hlawm thumin programme duan a ni a. Hlawm 1 -chu July ni 21-27, 2022 a ni ang a, Detoxification hun atan hmangin BCM lam atangin Christian Hospital Serkawn a Doctor leh nurse ten an buaipui ang a. Hlawm 2-na chu July 28 – August 6, 2022 a ni ang a, Thlarau lama intuaitharna hun hmangin Upa RL Thianghlima, Mizoram Evangelical Ministry Team ten Camp an neih pui ang. Hlawm 3-na chuan August 7 atanga September 3, 2022 a awh ang a, Follow-up programme -ah hmangin Counselling, thlarau lama hmasawnna tura infuihna leh Police lam atanga infuih tharna te hmangin hun an hmang dawn a ni.
He programme
pawimawh tak maiah hian kan Police te taksa, rilru leh thlarau a siamthar an
nih ngei theih nan kohhran mipuite tawngtai pui turin kohhran hruaitu te leh
Mizoram Police hotu ten min sawm a ni.