Thingfal Pastor Bial leh Bungtlang ‘S’ Bial-ah Sunday School Training neih a ni.

July 9-10 khan Thingfal Pastor Bial huapin BCM Zion, Thingfal-ah Sunday School Training neih a ni a. He Training-ah hian Resource Person pathum Upa H. Thangrivunga, Upa LP. Lalramzawnga leh Upa T. Lalsangpuia te hman an ni. Bial chhunag Kohhran hrang hrang paruk atangin Sunday School Zirtirtute leh Puipate-mi 110 zet an tel thei a. Bialtu Pastor leh Pro.Pastor ten an tawiawm bawk.

Inrinni nilengin Training hi neiin, Resource Person ten hun insemin an kaihruai a. Inrinni zan-ah BCM Zion ah Pathian Biak inkhawm neiin, Upa T. Lalsangpuian thuchah a sawi a. Pathianni zing leh Pathianni zanah te Bial chhunga Biak In hrang hrangah inthenin Sunday School Campaign an neih chhunzawm a. Pathianni chawhnu-ah BCM Zion-ah bawk Sunday School Seminar neih chhunzawm leh a ni bawk. 

Bungtlang ‘S’ Pastor Bial-ah July 9-10 chhung vêk khan BCM Biak In, Bungtlang ‘S’ ah Sunday School Training & Seminar buatsaih a ni a. Headquarters atangin Sunday School Trainer Upa C. Lalremsiama leh Upa J. Lawmsanga te kalin Training hi an neihpui a. Bungtlang ‘S’ Bialah hian kohhran 5 awm in Zirtirtu  leh Puipa 110 an awm a, Seminar-ah hian mi 67 an kal khawm a ni.

Inrinni nilengin  Seminar hi neih a ni a, Chawhma lamah Upa C. Lalremsiama’n Sunday School zirtirtu  ṭha tak ni tura pawimawh te sawi in hun a hmang a, Chawhnu lamah Upa J. Lawmsanga’n ‘Sunday School Zirtirtu Ṭha’  tih thupui hmangin Zirtirna a pe ve leh bawk. Resource person ten hun an hman zawh hian sawihona hun hmangin, Sunday School hmasawnna tur kawng hrang hrang te pawh sawihovin hun an hmang a ni.

Pathianni zing leh zan–ah Bial chhung kohhran hrang hrang ah Sunday School Campaign neih chhunzawmin, Upa C. Lalremsiaman zing lamah Bungtlang S ah hun hmang in, zanah Bcm Zion-ah a hmang a. Upa J. Lawmsangan zing lamah BCM Elim leh Zan lamah Bungtlang S ah te hun a hmang a ni.