Christian Education Department bultumin Sunday School Meet Pastor Bial 2-ah neih a ni:

July 9, 2022 (Inrinni) khan Christian Education Department ruahmanna angin Chanmari Pastor Bial, Lunglei leh Republic Vengthlang Bial, Aizawl-ah te Sunday School Meet buatsaih a ni a. He hunah hian Tleirawl te tana hriat tur pawimawh tak tak zirhona neih a ni a, tunlai khawvel-in a buaipui Zu leh ruihhlo leh thil tha lo hrang hrang, hmachhawn dan tur leh hneh theih dan te zirho a ni.

Chanmari Pastor Bial chuan BCM Biak In, Chanmari-ah Baptisma, Intermediate leh Senior ‘A’ zirlaite kokhawmin Sunday School Meet hi an nei a. Resource person–ah Upa C. Saihmingliana, SS Trainer Tv. C.Lalhmachhuana, Audio Visual Production Manager te hman an ni.  He hunah hian Bial chhunga Kohhran hrang hrang atangin zirlai 250 zet an kal a ni.

Republic Vengthlang Bial, Aizawl chuan BCM Biak In, I.T.I  ah Upa P.C.Vanlalrova, Sunday School Trainer chu Resource Person-a hmangin Sunday School Meet hi an nei thung a. Hetah pawh hian Tleirawl puala hun hmangin Intermediate zirlaite leh Senior ‘A’ zirlaite 70 zet an kal khawm a ni.