Tunkar Pathianni June 19, 2022 hi Mizoram Baptist Kohhran Ni pawimawh “Relief Sunday” a ni a. He Ni hi Mizoram Baptist, Tualchhung Kohhran tinah hman a ni ang. Relief Sunday-ah hian Pathianni zing inkhawmah Headquarters leh Tualchung Relief rawngbawlna chanchin te leh thupui thlan sa hmanga thuchah te sawiin ngaihthlak thin a ni.
Mizoram hian hun harsa leh khirh khan tak tak a tawk fova. Mautam tam, rambuai leh sawikhawmte bakah, khuarel chhiatna (natural calamity) chi hrang hrang, kangmei, tuilian, leimin, thli leh lirnghing, etc. te tawkin, mipuiin tam leh manganna rapthlak tak tak kan lo paltlang tawh thin a ni.
Kum 1990 atang khan Relief & Development Department dinin, he Department kaltlang hian nasa takin hma a la ta a. BCM aiawhin a tulna hmun apiangah tanpuina leh chhawmdawlna hna chu vawiin thlengin a la thawk ta zel a ni. Tunah chuan Assembly hnuaia Department lian tak pakhat niin, rawngbawlna zau tak neiin hma a la mek a. Tualchhung Kohhran tinah Relief Committee pawh dinin Tualchhunga tanpui ngaite tanpui hna leh hmasawnna leh intodelhna tur te, mi harsate dinhmun chawikanna hna te an thawk thin a ni.