Mission rawngbawlna Chanchin

#BCM Salem, Lawngtlai Mission Committee hmalaknain hnamdang te pualin Crusade neih a ni.

Mizoram Baptist Kohhran, Salem, Lawngtlai Mission Committee hmalaknain June 9-11, 2022 chhung khan BCM Salem Biak In, Lawngtlai-ah hnamdang te pualin Crusade neih a ni a. He Crusade-ah hian Baptist Masihi Mission Evangelist te - Pu Ramtea leh Pu Beijnath te chu Speaker-ah hman an ni. 

He Crusade hian rah duhawm tak chhuahin Mi 3 te chuan Ringtu Baptisma an chang a, Director Masihi Mission Rev. Israel Lalremtluangan Baptisma a chantir a. Rev. H. Lalremtluanga, Bialtu Pastor in Lalpa Zanriah a buatsaih a ni. 

#BCM Gilgal Theiriat-in Mission Convention an nei.

June 10 – 12, 2022 chhung khan Mizoram Baptist Kohhran, Gilgal, Theiriat chuan “Mi tir ta che” tih thupui hmangin Mission Convention an nei a, Speaker-ah Pu T. Nghaksanga, Mission Promoter an hmang.

Zirtawp zan, Inrinni zan leh Pathianni zing leh zanah te Pathian Biak Inkhawm neiin, Speaker-in thupui then hrang hrang hmangin thuchah a sawi bakah Kohhran Zaipawl, BKHP leh BMP Zaipawl ten rawngbawlna an nei bawk. Pathianni chawhnu-ah Inpawlhona neiin BCM Mission rawgbawlna chungchang zirhona leh sawihona neih a ni bawk.

 

#AGS Mission leh Mission Promoter te Kawrpuichhuah Mission Quarters leh hmunhma te enin an kal.

June 13, (Thawhtan) khan Rev. Dr. R. Lalthanmawia, AGS – Mission leh Pu T. Ngahksanga, Mission Promoter te chu Kawrpuichhuah-a Missionary Quarters leh Mission ram leh hmunhma te enin an kal a. India leh Bangladesh insumdawn tawnna Boder Trade atana kawng laih leh Tuipui lei (Bridge) dawhkaina turin Mission Quarters leh ram a khawih tel dawn avangin insawn chhuah a tul dawn a. Hemi atana Quarters luah tur te dap leh ram leh Quarters chin fel dan tur te a hmunah kalin an en a. Missionary ten lo dawngsawngin ruahmanna leh kawng awm thei te an thlir ho a ni. 

A tuk Thawhlehni-ah lo haw chhovin, Tlabun leh Tuichawng a Mission School te rawn tlawh haw in, thawktu te nen inkawmhona hun hmang in an rawngbawlna kalmeka an hmalakna te an sawiho a ni.

#Tlabung Area Baptist Masihi Rawngbawlna ah Ringthar 5 an awm.

Baptist Masihi, Tlabung Area-a Evangelist Lalhmamngaihzuala te rawngbawlna-ah ringthar mi 5 neih belhin, Tunkar nilai zan, June ni 15 khan Baptist Masihi Mission Director, Rev. Israel Lalremtluanga chuan heng ringthar te hi Baptisma a chantir. A tuk, June 16 atangin Director, Baptist Masihi Mission leh a thawhpui te hian Hauruang leh Sazaikawn inka a Kawng laia hna thawk, Camp-ah rawngbawlna an neih chhunzawm a, Masihi Evangelist ten cham chilhin hun an hmang mek a ni.