Mizoram Baptist Kohhran, Pastoral Ministry-a Pension thlenga thawk, Rev. Lawmzuala, chu July 28, 2022 zing dar 2:00 khan, Civil Hospital, Lunglei-ah kum 86 mi niin Covid-Phneumonia vangin Chatuan ram min pan san ta. Hemi ni chhun dar 12:00-ah BCM Biak In, Lunglawn E-ah Vuina Inkhawm neihpui a nih hnu-in Lunglawn Thlanmual-ah ropui taka thlahliam a ni.
Biak In lama vui Inkhawm tan hma hian In lamah thlahna hun serh tawi hmangin Upa Chhankhman’n a kai hruai a, mimal leh pawl hrang hrang aiawh ten thu sawina leh ralna thilpek te hlanin, thla lakpui a nih hnu-ah Biak In lamah Vui Inkhawm neihpui a ni.
Rev. Lawmzuala Vuina inkhawm hi Upa H. Lalzarliana’n a a kaihruai a, Kohhran hruaitu te leh Pro.Pastor ten Bible an chhiar a, BCM aiawhin Rev. R. Lalnunzira, AGS Service-in thu a sawi a, Chhungkaw aiawh leh Tualchhung Kohhran aiawh ten an sawi bawk. Pastor Lawmzuala Vuina Inkhawmah hian Lunglawn ‘E’ Kohhran Zaipawl ten hla an rem a, Rev. Sangliankhuma Chinzah, Bialtu Pastor, Lunglawn Pastor Bial-in vuiin, thuchah a sawi hnuah, Malsawm tawngtaiin Vuina Inkhawm tih tawp a ni. Inkhawm banah Biak In chhungah thla lakpui niin Thlanmualah kalpui nghal a ni a. Thlanmual-ah hian Upa PC Lalhmingthanga’n tawngtaiin a thlah liam ta a ni.
Rev Lawmzuala hi May 20, 1936 ah Mampui, Lawngtlai District ah a piang a, A nupui Pi Lalchhungi nen kum 1957 ah inneiin fa 11, mipa 8 leh hmeichhia 3 an nei a. Kum 1965-ah Pastor atan lak a ni a, Pastor Bial hrang hrang kil khawr tak tak thlengin a lo enkawl tawh a ni. kum 2000 ah Superannuation pension-in a chhuak a ni. Rawngbawlnaa mi inpe, mi hlim thei leh fiamthu du h em em, a bula awm nuam em em a ni.
Rev. Lawmzuala thihna hian Mizoram Baptist Kohhran pumpui a fan chhuak a, a chanchin hria apiangin an uiin, an sun takzet a. BCM chuan Thahnem ngai taka Lalpa rawng a lo bawl tawhna te hre rengin a rawngbawlna avanga lawmthu sawi chungin, ui leh zah takin a thlah liam ta a ni.
