July 29, 2022 (Zirtawpni) khan Mizoram Baptist Kohhran, Worship Department buatsaihin Worship Trainers Training, BCM Hall, Serkawn-ah neih a ni a. He hunah hian Aizawl, Lunglei leh Lawngtlai Area-a Worship Trainers atana Department Committee-in a ruat te kal khawmin, Resource Person-ah Upa C. Hrangdula, BCM Statistician hman a ni.
Training hi hun hniha thena hman a ni a, chawhma lamah Resource person buatsaih “Lengkhawm zai leh Solfa zaia Lalpa fak dan tha” tih thupui zirho a ni a. Sawihona leh Training pek chungchanga thil pawimawh te sawiho a ni. Chawhnu lamah Rev. R. Lalnunzira, AGS-Service-in hun hmang in kalkhawm te fuihna thu a sawi a, Worship Trainers te atangin ngaihdan leh pawimawh an tih te sawi hona hun an hmang bawk.
Worship Department chuan Pastor Bial leh Tualchhung Kohhran-ah te Inkhawm, Zai hruai leh Zaipawl Conductor te hnena Training pe turin Trainers atan mi 17 - Aizawl Area atangin mi 5, Lawngtlai Area atangin mi 4 leh Headquarters (Lunglei) Area atangin mi 8 te ruatin, heng Trainers te hian a tul angin Bial leh Tualchhung Kohhran-ah te Training an pe ang a, hetianga Training pe tur hian Worship Department kaltlangin sawm theih an ni ang.